Íslenskt golf

Sælir golfarar og þið hin sem ekki eruð sýkt af golfbakteríunni !

Ég var svo heppinn að fara í golfskóla á Spáni í vor. Þar var stokkið út á hverjum degi á stuttbuxum einum fata og spilað golf allan daginn.

Þessu er örlítið öðruvisi farið hérna á klakkanum. Ef spila skal golf, er aðal undirbúningurinn falinn í því að skoða hvernig klæða skal af sér veðrið. Golf á Íslandi minnir eiginlega á vetraríþrótt frekar en golfið sem Tiger Woods og félagar spila. Ef þar bærir hár á höfði eða fellur dropi úr lofti er óðara öllu frestað þar til óveðrinu hefur slotað. Undantekning eru Skotar frændur okkar sem ekki kalla allt ömmu sína í þessum efnum, enda skyldir okkur. Er nema von að manni finnist golf vera allt önnur íþrótt á Íslandi en erlendis?

Í framhaldi af þessu...Ég talaði á Skype við bróður minn um daginn, en hann býr á Nýja Sjálandi. Hann tjáði mér að hann hefði fingurbrotið sig á níundu holu. Svo var ég truflaður og náði ekki að spyrja hann hvernig þetta væri eiginlega hægt. Enn hef ég ekki náð í hann aftur til að spyrja hann um þetta. Svo spurning dagsins er, hvernig fingurbrýtur maður sig í golfi. Spyr sá sem ekki veit.

Athugasemdir

[Sigurpáll Ingibergsson, 23.9.2007 kl. 11:36]

Sæll netverji!

Já, það er munur á aðstöðunni hér á landi og heitu löndunum erlendis. Við erum þó að nálgast þau með golfhermum og knattspyrnuhöllum. Árangur Birgis Leifs sýnir það að bilið er að minnka.

En varðandi brotinn fingur, þá veðja ég á að golfkerra eða golfbíll sé orsakavaldurinn að fingurbrotinu. Ekki sjálf sveiflan. Hún hefur áhrif á bakið.

Fingurbrot eru mjög algeng brot. Í Læknablaðinu frá árinu 2000 er greint frá rannsóknum á beinbrotum í Reykjavik árið 1998.

Algengustu brotin reyndust vera: brot á fjærenda geislungs, 421 (14,7%); fingurbrot, 381 (13,3%); rifbrot, 292 (10,2%); ökklabrot, 192 (6,7%) og miðhandarbrot, 186 (6,5%). Samtals voru 10 algengustu brotin um 2/3 brotanna.

Þannig að brotinn fingur er tölfræðilega eðlilegt brot!

Palli, með forgjöfina í botni.